Akademi Kreyòl Ayisyen: Ki pwoblèm? Ki avantaj? Ki defi? Ki avni? Ak Kòlòk Entènasyonal sou Akademi Kreyòl Ayisyen an 26-29 oktòb 2011

"Nan yon kominote plirileng, rapò lang yo genyen youn avèk lòt konn mennen Leta devlope yon pwosesis regilasyon nou rele politik lengwistik ki pèmèt nou chèche ekilibre pratik sosyal yo an rapò avèk pratik lengwistik nan kominote a. Nou enskri desizyon Konstitisyon 1987 (Atik 213) la ki kreye yon Akademi kreyòl ayisyen nan kad politik lengwistik sa a. E nan kad demach pou etabli enstitisyon sa a pou bay fonksyònman kreyòl ayisyen an jarèt, yon komite inisyativ jèmen pou mete Akademi kreyòl la kanpe. Komite pou tabli Akademi Kreyòl Ayisyen an fòme depi nan lane 2008 sou direksyon Inivèsite Leta d Ayiti ak yon gwoup moun ki soti nan divès enstitisyon nan peyi a (UEH, MENFP, MC, SEA, FLA, SAKS, KNVA, Jounal Bon Nouvèl, Près Nasyonal ...) Nan dat 26-29 oktòb 2011, komite a te òganize twa (3) jou kòlòk entènasyonal sou tèm Akademi kreyòl ayisyen : ki pwoblèm ? Ki avantaj ? Ki defi ? Ki avni ? Objektif kòlòk la se reflechi sou ki mwayen ak ki pwosede nou dwe mete an plas pou rive fonde yon enstitisyon ki va la pou rann kreyòl la sèvis nan devlòpman li selon jan li fonksyone syantifikman. Kon sa, refleksyon yo chita sou itilite Akademi an, sou mòd gouvènans nou dwe repoze fonksyònman li, sou kalite travay enstitisyon an va genyen pou li fè pou konsakre itilite sa a. Sa vle di, kat (4) kesyon tit kòlòk la poze yo jwenn repons nan divès kominikasyon nou rasanble nan liv sa a kote nou pibliye plis pase twa ka kominikasyon kòlèg yo te prezante. Plizyè disiplin syans lòm ak lasosyete te kwaze nan kòlòk la e chak kòlèg pote vizyon yo sou jan yo swete pou Akademi an fonksyone. Pami disiplin sa yo nou ka site : kreyolistik, lengwistik, tradiksyon, istwa, filozofi, sosyoloji, antwopoloji, ekonomi, dwa, ea oneal teknoloji... " Avèk tèks Renauld Govain; Nicolas André; Wien Weibert Arthus; Lionel Audant; Pascal Audant; Pierre Michel Chéry; Michel Degraff; Yves Déjean; Rachelle Charlier Doucet; Manno Ejèn; Isabel Martinez Gordo; Michel Hector; Jean-Vernet Henry; Marsha Hinds-Layne; Vinesh Y. Hookomsing; Michel-Ange Hyppolite; Marky Jean-Pierre; Rochambeau Lainy; Frenand Léger; Nicole Magloire; Rosanie Moïse-Germain; Jean-Marie Raymond Noël; Bénédique Paul; Pierre Antoine Paulo; Jean-Robert Placide; Jacques Pierre; William Smarth; Tontongi (Eddy Toussaint); Lemèt Zephyr.