"Қазақ әдебиеті тарихының" алтыншы томында ХХ ғасырдың басындағы әдеби процестерге талдау жасалды. Сол кезеңдегі әдебиеттің даму ерекшеліктері сарапталып, белгілі сөз зергерлерінің мұралары зерттелді. Кітапта халық поэзиясы өкілдерімен бірге Алаш қайраткерлері қалыптастырған жаңа әдебиеттің сол кезеңдегі жай-күйі және өркендеу жолы, ұласу заңдылықтары қарастырылды.
ХХ ғасыр басындағы қазақ әдебиетінің шынайы рухы, ұлттың азаттығы мен елдің тәуелсіздігі жолындағы өзекті арқауы патшалық Ресейдің отаршылдығы тұсында да, кеңестік саясат кезінде де ашылмай, айтылмай келген еді. Ұлттық әдебиеттің ұлы тұлғалары Шәкәрім Құдайбердіұлы, Ахмет Байтұрсынов, Міржақып Дулатовтан бастап бірқатар көрнекті тұлғалардың туындылары арнайы талданды. Тәуелсіздік алғанға дейін әдебиет тарихындағы орны жете сараланбай келген Ғұмар Қараш, Жиенғали Тілепбергенов, Бернияз Күлеев, Нарманбет Орманбетұлы сынды бірнеше ірі ақындардың шығармашылығы зерттелді.
Томға библиографиялық материалдар сұрыпталып ұсынылды.
