Aşgabat: Ylym, 2009. — 192 sah.Türkmenistanyň Prezidenti Hormatly Gurbanguly Berdimuhamedowyň ýolbaşçylygynda ýurdumyzda durmuşa geçirilýän "Saglyk" maksatnamasy lukmançylyk işgärleriniň önünde uly wezipeleri goýdy . Şol wezipeleri amala aşyrmak lukmançylyk ýokary okuw mekdebinde ýaşlara berilýän bilimiň hilini ýokarlandyrmagy, çuňlaşdyrmagy we okuw işleriniň geçirilişini kämilleşdirmegi talap edýär. Şu işleri dogry ýola goýmagyň esasy şertleriniň biri hem talyplar we mugallymlar üçin okuw kitaplaryny taýýarlamakdyr.
Adam we haýwan organizmi bir bitewi sistemadyr. Ol janly materiýany düzýän organizasiýanyň birnäçe derejelerinden ybarat: öýjükler – dokumalar – organlaryň gurluş-işjeň birlikleri – organlar – organlaryň sistemalary. Organizasiýanyň her bir gurluş derejesiniň beýleki derejelerden tapawutly morfofunksional aýratynlyklary bardyr.
Gistologiýa (grekçe "histos" – dokuma, "logos" –ylym) – öýjükleriň, dokumalaryň we organlaryň ösüşini, mikroskopik, elektron mikroskopik gurluşyny hem-de ýaşaýyş işjeňligini öwrenýän ylymdyr.
Gistologiýa sitologiýany – öýjük baradaky ylmy, embriologiýany – düwünçek baradaky ylmy, umumy gistologiýany – dokumalar baradaky ylmy we hususy gistologiýany – organlaryň mikroskopik gurluşy baradaky ylmy özüne birikdirýär.
Ewolýusiýa hadysasynda organizmde wajyp funksiýalary ýerine ýetirmäge ýöriteleşen öýjükleriň we öýjük däl gurluşlaryň toplumyna dokumalar diýilýär. Her bir dokuma üçin (epitelial dokuma, gan, birleşdiriji dokuma, myşsa dokumasy, nerw dokumasy) diňe özüne mahsus bolan gurluş, ösüş we ýaşaýyş işjeňliginiň aýratynlygy häsiýetlidir. Umumy gistologiýa, gistologiýa ylmynyň bir bölümi bolup, organizasiýanyň dokuma derejesine degişli bolan umumy kanunalaýyklyklaryny hem-de her bir dokuma üçin häsiýetli aýratynlyklary öwredýär.
"Umumy gistologiýa" okuw kitabynda epitelial dokumalar, gan we limfa, birleşdiriji, myşsa hem-de nerw dokumalary barada giňişleýin maglumat berilýär.
Okuw kitaby Türkmen döwlet lukmancylyk institutynyň kesel bejeriş, pediatriýa, keselleriň öňüni alyş, stomatologiýa fakultetleriniň talyplary üçin niýetlenendir. Kitaby gistologiýa dersini öwrenýän ýokary okuw mekdepleriniň talyplary hem ulanyp biler. Ol mugallymlar we saglygy goraýyş edaralarynyň lukmanlary üçin gollanma bolup hyzmat eder.
