Ansiklopedi Syans ak Educa Vision, Volim 4: Syans Latè

"Educa Vision anonse ak kè kontan piblikasyon premye ansiklopedi syans nan lang kreyòl Ayisyen an. Se yon kontribisyon orijinal pou ogmante kantite liv amizman ak liv edikatif an Kreyòl. Ansiklopedi Syans lan prezante enfòmasyon itil, amizan, ki prezante byen bèl epitou ki ankouraje timoun al chèche konnen pi plis. Ansiklopedi a esplike konsèp debaz nan domèn lasyans tankou sik lavi, pwopriyete materyèl, estrikti òganis vivan, fòs, mouvman, lespas, matematik ak lòt konesans toujou. Tout tèm sa yo gen koneksyon ak syans, teknoloji, jeni ak matematik epitou gen koneksyon ak kourikouloum syans. Gen enfòmasyon itil pou lekòl, gen enfòmasyon amizan pou moun ki kirye epi ki anvi aprann pou kont yo. Pou devlope ansiklopedi a, Educa Vision te rasanble yon komite ki gen syantis pou verifye kontni, edikatè pou verifye pedagoji, konseptè grafis pou mete elegans, fotograf, korektè ak konseye teknik. Nou seleksyone foto ki pote enfòmasyon adisyonèl ki amonize ak tèks yo epitou ki reprezante lavi moun toupatou nan peyi a. Nou ilistre epi adapte tèm yo ak egzanp ki reprezante diferan kondisyon anviwonnman nou jwenn non sèlman nan peyi nou Ayiti, men tou ki reprezante reyalite ak divèsite ki egziste sou planèt latè."